突然想起少女心事

昨晚訓唔著嘅時候﹐突然想起我第一次有人約我情人節出街呢件事!

呢個人係我阿哥嘅朋友 (佢地家下都好少見喇。。)﹐我當時十四五歲左右﹐好明顯咁暗戀佢架! 我知佢都係鐘意我嘅! 有一日﹐我阿哥同佢講講下電話﹐佢話叫我聽。 咁我梗係好緊張啦﹐佢問我星期幾 (唔記得係星期幾﹐總之係平日啦) 出街好唔好﹐我唔知係緊張定怕醜﹐竟然答第二日要返學﹐所以唔好。 一收線至醒起係情人節﹐當堂後悔到不得了! 我一路希望佢可能會再約多我一次﹐不過佢冇呀! 佢咁明顯同大膽咁約我情人節出街我都拒絕佢﹐我諗佢都死心啦! 但係﹐我又唔敢約番佢喎! 就咁﹐ 我地就不了了之喇!

查實我真係好想知﹐如果我地出咗去﹐咁我地會點。 我會唔會因為同佢拍拖就唔俾心機讀書呢! 佢一啲都唔似係鼓勵人讀書嘅人! 咁冇讀大學就唔會做咗呢份工啦! 咁我依家會做咗緊乜啦? 英文唔好又唔會識倒我呢個老公啦! 咁我會嫁得出未呢? 哈哈

聖誔節

當然點都 要講下啦! 今年我老公就送咗一隻手錶 (當然係有隱喻啦!) 同一件蜂場制服俾我! 下年﹐我就要開始學打理班蜜蜂喇。

請原諒我地個樣咁攰! 因為影相時都好夜喇! 呢棵聖誕樹係我地喺樹林度揀架! 我覺得好靚呀!

佢無論係大小﹐高度同埋樹幹嘅密度都啱啱好!

真係討厭到不得了!

由於呢個丹麥政府一定要我學丹麥文。 所以寄咗封信黎通知我要盡快開始上堂同埋佢地將會資助我嘅學費咁! 但係﹐最令人討厭嘅係呢封信﹐佢地係用丹麥文寄俾我嘅! 如果唔俾老公翻釋﹐我根本唔會知係乜! 我真係唔明﹐你明知我唔識丹麥文至叫我學﹐點解封信唔用英文?!

呢個國家﹐就算你同佢地講明要用英文﹐佢地實話冇問題﹐結果佢地都會用番哂丹麥文! 然後﹐如果你打電話再"提下佢地"咩? 佢地又會話﹐我唔明嘅話可以打俾佢地﹐佢地會翻譯我知﹐不過﹐冇辦法寄英文信。 真係討厭到不得了! 喺香港﹐差唔多乜嘢都可以中英對照。 外國人一定唔覺得"被拒諸門外"。 我有咁多外藉老細﹐個個都鐘意住香港多過走! 喺丹麥﹐所有嘢都差唔多時時刻刻提醒你﹐你係一個外國人! 真係討厭到不得了!

我根本冇辦法對呢個地方有歸屬感﹐反而我嘅思鄉病就越來越嚴重。。。