五月二日 星期二

今日收倒一篇" 香港女仔有幾好? 香港與國內女子不同之處"的email。 突然好興幸我識咗個鬼佬做男友﹐因為佢都幾難番大陸包二奶。 唔係唔得嘅﹐貴啲啫! 當然﹐丹麥女仔更可怕﹐佢地自己有錢﹐唔會為錢識男仔。 佢地會純為咗鐘意同開心。 喺我心目中佢地仲麻煩過香港女仔。 自尊心好強!!

四月廿十九日 星期六

今日 - 我去咗踩單車!!!!! ^_^

有部新單車﹐就當然要快啲學踩啦。 行路唔行得好遠﹐我一到咗星期六日就叫男朋友車我出去玩。好似細路咁!

我男友就車咗我去機場附近嘅一條單車徑嗰度踩﹐佢自己就約埋一個朋友一齊去踩ROLLER陪我。 好彩佢約埋個朋友咋﹐如果唔係我諗我實學唔成。佢朋友一見倒我就知我"運動型"啦﹐上單車都危危乎咁。 我架單車全程都好似未試過有十米以上係踩緊直線﹐一路都好似條蛇咁去。好驚"炒"車嘛﹐因為單車路兩邊就係一個農場﹐有馬有雞又有鹿﹐跌咗入去仲唔嚇死我。 啲鹿可能驚過我﹐不過我都好驚啲雞屎!!!! 佢朋友踩ROLLER好叻﹐所以佢可以全程捉住我手臂﹐幫我壯下膽踩落去。

(而事實上部單車真係好大部﹐我要斜哂身﹐一邊腳先至緊緊"掂"倒地。個SALES同我男友死話啱﹐我都話我成十幾年冇踩過單車﹐我唔要快﹐最緊要易踩啲。 佢地都係唔明我呢啲唔做運動嘅大都市女仔想要嘅嘢。 我想一部又靚又易踩但係睇落又唔低能嘅。)

講番踩單車﹐去程都幾好﹐雖然唔係好直。 回程就慘喇﹐又再一次落大雨﹐你見我早幾篇嘢都講過啦﹐丹麥落嘅雨係好凍架。 再加上我又踩緊單車﹐想用手撥開面上嘅雨水都唔得。 當然兩條大脾又再一次凍到痴肺。 條路又濕﹐我就越踩越驚﹐好驚"跣"親。

終於都好辛苦咁番到起點喇。 由於落雨嘅關係﹐我回程嘅時間係短過我去嘅時候大約十"份"鐘左右架! 有冇發現我冇提過我男友呢? 冇錯﹐由於佢掛住自己踩ROLLER﹐佢話一上單車就識踩架啦喎﹐所以冇理我! 所以﹐我咪話﹐好彩佢有叫佢朋友去。

我諗我有排都未夠膽喺馬路度踩單車! =(