慘過死

有人話我似丹麥人或者以丹麥人自居! 呢個評語真係令我慘過死!

同過我老公傾計都知﹐我討厭丹麥人討厭到不得了!
套用周星馳一句名句 - "佢簡直係無聊﹐冇深度兼無厘頭"﹐ 但係又成日扮有見識懶有型!
唔好以為我貪順口﹐每一句我都可以揾倒例子!

佢地當然有好人﹐不過除咗我老公同我老爺之外﹐我仲未有幸遇倒!

佢地有一點我最欣賞嘅就係佢地每個人都好了解自己嘅歷史同文化。 就算唔係學校需要﹐佢地自己都會買好多歷史書睇。 對自己國家每一個地方嘅過去都有一定了解。 我老公自從識咗我之後就成日睇中國同香港歷史書﹐我相信佢依家一定己經知多過我!

Eat Dust

依家我成日踩單車﹐踩得多﹐我都越來越大膽。 諗起幾個月前第一次踩上街度﹐我真係好驚! (睇鬼片咁﹐你話我有幾驚吖!) 唔好話見倒有私家車﹐見倒有對頭單車我都想停低讓佢過。
跟據丹麥人講﹐佢地一般都情願你唔好突然停﹐只要你一路踩﹐佢地會避倒你。

家陣當然唔同啦﹐想我停低讓你? 諗下好喇! 我連大巴士大貨車行埋同一條路﹐我都唔怕!
(以經聽見有大車聲迫近﹐我一定立刻停埋一面!)
最怕係一條直路成日唔夠佢地快﹐要喺後面 eat dust - 食佢D塵! 如果上緊斜﹐我仲要大啖咁透氣! 真係好把火架!

最近我正開始減肥﹐每日定時磅一磅! 以前喺香港﹐減肥咪有一餐冇一餐咁食少D。 同埋俾心機做嘢﹐忙就唔記得食架啦! 由於一間屋得兩個人﹐我減肥又唔可以悶親同餓親我老公! 再講﹐佢如果見倒我用唔好嘅方法減肥﹐佢實會煩死我。(呵呵﹐我將會係佢未來BB個媽咪﹐佢當然擔心我身體唔好會生唔成BB啦!)

家下我用緊最人所共知嘅減肥法 - 就係食少D同做運動! 我盡量唔用油煮餸﹐菜肉同飯都好平均。每日食 1000 - 1200 Kcal! 每次買餸都只買一日份量﹐咁我就每日都要踩來回共半個鐘單車去買餸喇! 有時好精力﹐我仲會走一條遠咗半公里嘅路!
哈哈﹐唔係講笑﹐過去五日我都好平均咁每日輕 0.2kg! 都幾好﹐減得幾舒服!

落雹

落雹雖然唔算係乜嘢特別﹐但係丹麥落雹嘅次數真係好密下。
有時仲要係完全冇雨﹐陽光普照都係咁落大大粒! 呢個情況都幾鬼異架!