六月廿二日 星期四

突然好想揾朋友出去行下街﹐唱下K。 出去打個邊爐都好吖!
冇朋友又唔識自己周圍去﹐突然好悶! 我再唔轉工﹐我諗我會癲架喇!

好掛住曳豬呀!!!!!!

六月十八日 星期日

今日就勁喇! 我又去咗踩單車喇! 今次勁咗好多! 平衡得好好呀! 不過都係唔夠膽落斜!

六月十四日 星期三

今日就冇乜特別嘢發生! 不過見大家咁想睇相﹐我就將今日晚餐嘅傑作放俾大家睇下啦!

有"蕃茄草茹旦花湯"同"酸甜排骨"!



同昨晚一樣﹐乜都食哂! ^_^

六月十三日 星期二

首先﹐ 當然係恭喜哂阿Jon (前名阿John) 終於大學畢業啦! 得咗五年﹐今日終於學有所成﹐我都好安慰呀! 快啲識番個女仔﹐致番頭家囉。。。。。。。。

今個月﹐我肯定蘇x會話我有小型嘅血光之災! 我不停出小事! 昨晚就拗柴﹐痛咗成晚﹐今朝仲腫哂! 冇得睇跌打﹐都唔知點醫!

好消息係﹐我今日第一次由零開始整pizza﹐好成功! ^_^ 我老公仲食哂呀!!

六月十二日 星期一

我知我知! 我明我明! 我係成個月冇寫過Blog! 不過你地都要睇諒下我新婚嘛﹐點可以成日對住部電腦呢?! 會導致離婚架! ^_^ 講下笑啫!

今日真係好鬼熱呀! 成25C! 太陽由七點哂到夜晚九點幾! 你實話"25C唔係好熱啫"! 當你身處一個冇風扇而同時開冷氣係犯法嘅地方﹐你就會真正明白25C而有太陽哂住係幾咁熱!

太陽開始猛咗一兩個星期﹐我就已經哂到出咗好多雀班! 我喺香港都從未出過! 啲丹麥人話"因為香港多空氣污染﹐啲污染物阻隔咗部份陽光﹐所以咪冇咁猛太陽同冇咁易出雀班囉!" 唔知真唔真﹐不過﹐如果係真﹐咁空氣污染至少有一個好處﹐就係防雀斑!