四月十八日 星期二

今日終於暖番小小喇! 意思即係中午有陽光既時候氣溫都有双位數架。 唔錯唔錯!

咁我就襯食飯時間行去超級市場買啲嘢黎食啦。 竟然俾我見倒一樣喺丹麥平過香港一半有多嘅嘢啝 - 就係士多啤梨喇! 睇下張相啦! 2kg都只係賣DKK40蚊﹐仲係甜架添呀!

嚟咗丹麥﹐ 我開始知道多啲乜嘢生果同蔬菜係時令啦。 平日喺香港﹐媽咪買咁多嘢食放喺屋企﹐ 再加上想食乜就同媽咪講。 點會知道乜嘢係時令吖。 有時媽咪都會話呢個季節冇得賣呢啲嘢架喎﹐我聽左通常就算架喇。


至於我點食啲士多啤梨呢? 當然係用我至愛既方法啦 - 加cream!

你都應該記得我男友佢出咗trip啦。 咁大盤士多啤梨﹐我一日食足三餐都未食哂! 聽日自己又要出trip﹐ 註定都係食唔哂。 點解我都要出trip? 因為我男友出trip﹐我又怕自己一個喺屋企﹐咁咪揾啲客見下囉。

四月十七日 星期一

今日係復活節既最後一日假期﹐我男朋友竟然今日要出TRIP!!

咁我咪唯有去送佢機囉﹐諗住可以o係機場對多陣啦﹐點知佢話佢要準備個Presentation﹐叫我走先喎。 你話係咪激死吖!

由於我太得閒喇﹐所以我就決定自己由機場搭火車然後再行路返屋企。 聽落都冇乜野吖。
其實係好難架﹐首先﹐成個火車站係冇英文指示牌架。 如果我一搭錯車﹐我就會去左Sweden架喇。 仲有﹐我張車票只係得三小時有效期﹐一過左時限﹐我又要再俾錢買過張架喇。 對於只係去"送機"黎講﹐實左太貴喇!!

安全咁去到我要去既車站﹐咁我梗係行下街先啦﹐見倒有一份星島曰報﹐雖然佢既厚度只係得香港既1/4﹐仲要賣DKK20 (即係 HKD25)。 但係我都即刻買左一份﹐仲睇哂添!

跟住就精彩喇! 首先﹐我好開心咁見倒我想買左好多日又揾唔倒既野 - 就係一把遮!!
我用DKK50買左一把o係香港頂哂籠值廿蚊既全黑既縮骨遮。 好開心咁即刻用佢同開始行番屋企啦﹐一出車站﹐過左一個馬路位﹐冇大厦擋住﹐我把遮就即刻吹到反左同爛埋! 我終於明點解呢度O的人唔用遮啦﹐因為實好快爛。

結果﹐我返到屋企既時候全身濕哂﹐由於o的雨水太凍﹐我對大脾凍到紅哂 (紅到好似燙傷咁)﹐沖涼o個陣仲好痛呀! 當時感覺都幾慘。 如果o係香港﹐我第一時間同阿媽講﹐仲要佢"哦"足我一日﹐ 咁我就安樂哂喇! ^_^

四月一日 星期六

我將會唔跟日子又唔跟次序咁Post我既日記﹐ =) 所以你跟住個中文日期嚟睇啦! 原因係我成日有字唔識打﹐ 要用啲時間試下試下至揾倒啲字囉!

多謝你嚟睇我喎!!! ^_^