四月十八日 星期二
今日終於暖番小小喇! 意思即係中午有陽光既時候氣溫都有双位數架。 唔錯唔錯!咁我就襯食飯時間行去超級市場買啲嘢黎食啦。 竟然俾我見倒一樣喺丹麥平過香港一半有多嘅嘢啝 - 就係士多啤梨喇! 睇下張相啦! 2kg都只係賣DKK40蚊﹐仲係甜架添呀!
嚟咗丹麥﹐ 我開始知道多啲乜嘢生果同蔬菜係時令啦。 平日喺香港﹐媽咪買咁多嘢食放喺屋企﹐ 再加上想食乜就同媽咪講。 點會知道乜嘢係時令吖。 有時媽咪都會話呢個季節冇得賣呢啲嘢架喎﹐我聽左通常就算架喇。
至於我點食啲士多啤梨呢? 當然係用我至愛既方法啦 - 加cream!你都應該記得我男友佢出咗trip啦。 咁大盤士多啤梨﹐我一日食足三餐都未食哂! 聽日自己又要出trip﹐ 註定都係食唔哂。 點解我都要出trip? 因為我男友出trip﹐我又怕自己一個喺屋企﹐咁咪揾啲客見下囉。
posted by Gerrillaz @ 12:05 pm
1 Comments:
At April 30, 2006 6:10 pm,
Anonymous said…
真係揭開人生新一頁咁款喎，嘻嘻~ 恭喜恭喜！
完全感覺到你好enjoy去試去闖，再細微既事都變得有趣，即使受傷都係一種體驗，好開心無聽到你叫苦，反而好正面咁話：又學識左多d！好！不愧為我家姐呀！哈哈！
Denmark生活咁悠閑，唔好"side"左個氣氛，得閒記得搞d生活小情趣，整d溫馨既家居裝飾怖置，呢d野自己諗先好玩，成個過程你一定好enjoy，即使最終可能你只係搬左幾個相架！哈哈哈~~ 不過，都影低d家居照、生活照俾我地睇下，知唔知呀？
其實，睇你個blog，最感動莫過於知道你明白媽咪「哦」你、家人「煩」你，其實，係一種關心。你估你要就有嫁？！襯你無得駁咀，宜家仲唔公然話多你兩句！哈哈哈！算啦，你明就好喇。
咁你最後點解決凍傷既大脾？有無睇醫生？
我將你寫既野讀俾媽咪聽，結果我幫你受左呢個「哦」的關心！哈！媽咪不停話：咁點呀？點解會落雨都整傷嫁？你叫佢好去睇醫生添呀！唔好o係到"au"呀，咁唔得嫁，唔好話等多一兩日睇下點先呀，呢d同灼傷無分別嫁，一定要睇醫生嫁！唉，都唔知佢有無去既，亂黎，又唔知點，唉......之後個d，你應該大概估到意思差唔多，不過先後次序唔同咁環回重複，嘻！
希希聽到既反應係：叫二姨返黎啦，個度咁凍！快d返黎飲熱野啦，飲d幾百度咁熱既咪唔凍囉！
聽到係咪好開心呢？
未來姐夫成日出trip，你好好照顧自己，小心d喇。有咩事記得打番黎，可能我地俾唔到即時實質幫助你，但至少你一定唔會亂晒籠、唔知點好！我相信只有連家既仔女，先感受到媽咪愛既威力！哈哈！
繼續努力你denmark生活啦，我諗應該都幾開心得意的！
Post a Comment
<< Home