名貴的剪刀

我老公買咗一把專剪家禽嘅剪刀 - 港幣約 500 元! 佢嘅特點係全把剪刀都用 stainless steel 同埋可以拆開哂嚟洗﹐咁就唔會有D地方洗極都洗唔倒。 可用一世架! 為咗用佢﹐我地立刻買咗隻雞嚟焗啦! 我亦立刻創作咗一個新食譜 - 蜜糖迷迭香焗雞! 又真係剪得幾整齊嘅! (又冇大菜刀﹐冇計啦! 俾個鬼佬叻一次咁大把啦!)

非常好味﹐D汁撈落個薯仔度好正! 我仲好好心機咁整埋個凱撒沙津﹐你睇下個樣幾健康! ^_^

因為隻雞太大隻﹐我地又得兩個人﹐所以就食咗兩晚。 第二晚就出事喇! 因為要再整沙津﹐我又要磨芝士。 點知變咗磨手指﹐磨咗一大"忽"肉。 真係好痛!!! 我真係唔記得上次"傷得咁深"係幾時! 頭又洗唔倒﹐又不停流血! 見倒個傷口第一眼嘅時候﹐我仲暈咗。 唔知係因為痛﹐還是係因為第一次見倒自己流咁多血﹐所以驚到暈。 當我最係"女人最痛"嘅時候﹐我老公仲要補多句 - 比較起生仔﹐你家下呢個痛算得乜吖! 佢真係癲架!