愛爾蘭咖啡

星期五晚﹐突然心血來潮想飲愛爾蘭咖啡。 喺丹麥﹐一般嚟講﹐最快最方便係自己整。 所以﹐我就上網揾咗一個自稱 The World‘s Best Irish Coffee 嘅 recipe 嚟整喇。 當然﹐ 大家可以唔洗擔心材料呢方面﹐ 因為酒 (Irish whisky)﹐espresso 同 cream 喺我屋企係一定唔會缺架! 冇咗佢地﹐ 我老公點做人呀? 如果要佢(連埋我)選擇其中一樣嘢唔要的話﹐我肯定佢唔洗諗就決定唔要我! 有時﹐聞倒佢杯酒會令我想起我阿"女麻"﹐因為我阿"女麻"食飯﹐成日都要o答番杯"長頸鹿"﹐尤其係有燒肉食嘅日子。 我記得陣氣味因為我食飯成日坐我阿"女麻"隔離!

講番杯愛爾蘭咖啡﹐的確係唔錯。 唔知係咪全世界最好﹐不過係我同佢認同飲過嘅最好。 即使我地咁業餘嘅人都整倒杯好飲過我喺街飲嘅﹐呢個 recipe 真係唔錯。

後記: 製作過程中﹐要點火嚟減小酒精成份同 caramelize o的啡糖。 一點火後﹐十秒左右﹐我隻杯就"click"咗一聲。 整熄火後﹐發現我隻杯竟然好整齊咁裂咗一個圈! 我老公話"一定係唔夠酒啦。。。"﹐因為我落得少酒過佢。 我就覺得呢個係部份原因﹐ 不過唔係全部! 星期六﹐我地再整﹐我無可奈何都落多咗酒﹐ 燒完之後倒俾佢先至落 espresso。 佢當然好歡迎我呢個做法啦!